टुकुचाको घाम
***********
एका बिहानै भुरर् उडे
एक हुल तन्नेरी चराहरू
अभावका यामहरू छल्न
जो स्वयंमा प्रभाती किरण थिए
टुकुचाको आकाशमा,बिथोलिँदै गएको वर्तमान
सम्भावित उज्यालो भविष्यका ।
यता
आँसु खसाइ रह्यो
बुढो पोथी
बुङ्गमतीकै लयमा
विष्णुमतीको ढाटबाट
आमाको मन न हो…
निकै बेर नियाली रही
दुर्गन्धित भुइँ
हिमानी आकाश छिचोल्दै
बैँसालु पखेटा फिँजाएर
उज्यालो टिप्न हिँडेका बचेराहरू ।
खोइ?
कहिले सङ्लिएला
कर्णालीको भोक
कोशीको डुबान
टुकुचाको मुहान
धेरै भयो नालापानीको वीरता रटेको पनि
झन् झन् बल्झिँदो छ कालापानीको घाउ
बुद्ध-शान्ति
कोत पर्व र सशस्त्र क्रान्तिको प्रयोगशालामा
रगतको त्रिशूली छादेर ।
सर्पले
रजश्वला भन्दैन,मान्छे जस्तो
छोइदिन्छ छाउ-गोठमा सुतेकी छाउपडी
र त,
निदाइ रहन्छ ऊ ।
कहिले न उठने गरी
दाह्रा किट्छ जड संस्कार…
समाज रूपान्तरणको पेरिफेरिबाट ।
बडा मिहेनतले
सुन्दर संरचना बनाउँछ डकर्मी ।
मूर्ति कुँद्छ शिल्पकार
अनि अछूत बन्छ ऊ
जब मन्दिर बन्छ,सुन्दर संरचना
भगवान बन्छ मूर्ति
भेदी रहन्छ मानवताको मुटु,
विभेद विहीन समाजको परिकल्पना ।
दुई केजी चामल किन्न
सिमापारी धाउँछ अचेल
हिजो-अस्ति धान बेच्ने किसान
आत्मनिर्भरतामा नयाँ आयाम थप्न ।
शान्ति,समृद्धि र विकासको
सामुहिक गीत गाइरहेको छ
बागमती किनारमा छरिएका
खालीशीशी,पुराना कागज
केलाइरहेका कवाडी संकलक दाइको
सद्दे रेडियो ।
यसपछि पालो
व्यापारिक विश्रामको
अनि सुरु हुनेछ कार्यक्रम
“बदलिँदो युग”
प्रदेशिएका तन्नेरी चरा घर फर्किएपछि
र
मुस्कुराउने छ,हिमाली हिउँ झैँ
प्रभाको पहिलो किरण
टुकुचासँग चिडिएको घाम
अब उप्रान्त
कहिल्यै नअस्ताउने गरी
उदाउने छ……
टुकुचाको घाम ।
टुकुचाको घाम ।।
✍️एमपी पाण्डे
बान्नीगढी,जयगढ गाउँपालिका,वार्ड नं ३ अछाम।