केन्टकी (अमेरिका) । अनेसास केन्टकी च्याप्टरको आयोजना तथा नेपाल गजल प्रतिष्ठान अमेरिका शाखाको सहकार्यमा १६०औँ मोती जयन्ती कार्यक्रम भव्य र सभ्यरूपमा सम्पन्न भयो । अनेसास केन्द्रका वरिष्ठ उपाध्यक्ष साहित्यकार लालगोपाल सुवेदीको प्रमुख आतिथ्यमा सम्पन्न उक्त कार्यक्रममा केन्टकी राज्यका लुइभिल तथा लेक्जिन्टन सहरमा बसोबास गरिरहेका कवि ,संगीतकर्मी, सांस्कृतिककर्मी, समाजसेवी, धार्मिक अभियन्ता र भुटानी समुदायका नेपाली भाषीहरूको बाक्लो उपस्थिति रहेको थियो ।

प्रमुख अतिथि तथा समाजका गन्यमान्य व्यक्तिहरूले युवाकवि मोतीराम भट्टको तस्बिरमा माल्यार्पण तथा दीप प्रज्ज्वलन गरी सुरु गरिएपछि अनेसास केन्टकीका सचिव जीवन निरौलाले कार्यक्रमको उद्घोषण तथा सहजीकरण गरे । अनेसास केन्टकी च्याप्टरकी उपाध्यक्ष रेखा जोशीले मोतीराम बहुमुखी प्रतिभा थिए भन्ने तथ्य प्रष्ट्याइन् ।

तत्पश्चात् केन्टकीका बाल प्रतिभा अनुपम थापाको जय जय माता भवानी भजन गायन रहेको सिडी बिमोचन गरियो । खेम रेग्मी , किशोर सुवेदी , अरविन्द निरौला ,ज्ञानेन्द्र दहाल , रेखा जोशी , मित्र सुवेदी ,बद्री दहाल, जीवन निरौला ,एकनारायण सुवेदी , एन्का अध्यक्ष सन्त कुवँर,अर्जुन थापा आदिले आ-आफ्ना मौलिक गजल, कविता , गीतिकविता वाचन गरे ।मूलत: शिष्ट श्रृङ्गारिक भावका र केही समसामयिक सामाजिक विषयवस्तुका गजलहरू समेत प्रस्तुत गरिए ।कसैले सामाजिक , कसैले देशप्रेम र राष्ट्रियता , कसैले मानवता र कसैले चोटिला व्यङ्ग्यपरक रचना प्रस्तुत गरे ।

गायक तथा संगीतकार मुरारि गुरागाईंले मोतीराम भट्टद्वारा रचित भक्तराज आचार्यले गाएको गजल , सचिव जीवन निरौलाद्वारा रचित गजल र आफैले रचना गरी संगीत भरेको गीतको गायन गर्दा मन्चमा आसिन सम्पूर्ण दर्शक तथा श्रोतावर्ग मन्त्रमुग्ध बनेर आनन्द सरोवरमा झुमेको थियो ।उपेन्द्र शाही निषादलेले गाएको गीत पनि चित्ताकर्षक थियो ।
कार्यक्रमको अन्तिम चरणमा अनेसास केन्टकी च्याप्टरका सल्लाहकार साहित्यकार डमरू पौडेलले कार्यक्रममा वाचन गरिएका कविता , गीत,गजल , मन्तव्य आदिको समारोहमै श्रवण गरिएका सामग्रीका आधारमा सबै पक्षलाई समेटेर संक्षिप्त शैली अपनाई गीति कविताद्वारा समीक्षा प्रस्तुत गरे ।

त्यसपछि प्रमुख अतिथि लालगोपाल सुवेदीले अबको अनेसास भनेको ठूलो छाता संस्था हो र यसको छहारीमा साहित्य, संगीत, कला, संस्कृति, धर्म , दर्शन र खेलकुद समेत अटाउन सक्छ भन्दै अब हामीले जातीयता, साम्प्रदायिकता , नेपालको जस्तो लुछाचुँडीपरक संकीर्ण राजनीतिक भावनालाई तिलान्जली दिईफराकिलो सोच र भावनाअनुसार अघि बढ्नुपर्ने तथ्यमा जोड दिए ।यसै क्रममा अनेसास विधानले सङ्केत गरेका मूलभूत पक्षमा ध्यान केन्द्रित गरी बलियो र आफैमा आत्मनिर्भर अनेसास बनाउनकालाई हामीहरूले थप परिश्रम गर्नुपर्ने कुरा औंल्याए ।सभा विसर्जन हुनुपूर्व सर्जकहरूलाई सम्मानस्वरूप प्रमाण- पत्र वितरण गरियो ।

कार्यक्रमको अन्तिममा मोती जयन्ती कार्यक्रम सफल बनाउन अमेरिकाको व्यस्त जीवन शैलीका बाबजुद पनि समय निकालेर सहभागिता जनाएका सबै सहभागीलाई एकमुष्ट रूपमा धन्यवाद व्यक्त गरे ।अनेसास केन्टकी च्याप्टर सबल च्याप्टरका रूपमा विकास गर्ने आफ्नो मूल ध्येय रहेकाले सबैले साथ सहयोग गरिदिनका लागि अनुरोध गरे ।