काठमाडौं । सवारी साधनहरुमा अंग्रेजी भाषाको इम्बोष्ट नम्बर प्लेट राख्ने सरकारको निर्णयप्रति नेपाली भाषा र साहित्यसँग सम्बन्धित संघ-संस्था र विज्ञहरूले असन्तुष्टी जनाएका छन् ।

सोही क्रममा सुनकोशी वाङ्मय प्रतिष्ठानले विज्ञप्तीमार्फत सरकारसँग त्यस्तो निर्णय पुर्नविचार गर्न आग्रह गरेको छ ।

अध्यक्ष छविरमण सिलवाल र महासचिव प्रदीप सापकोटाको संयुक्त हस्ताक्षरमा जारी विज्ञप्तिमा ‘नेपालभित्र दर्ता भएका सवारी साधनहरुमा इम्बोस्ट नम्बर नेपालीमा नराखी अँग्रेजी नम्बर प्लेट राख्ने निर्णयले नेपाली भाषा, जुन सरकारी कामकाजको भाषा पनि हो यसको अबमुल्यन हुन जान्छ’ भनिएको छ । साथै जनस्तर र विभिन्न संघसंस्थाहरुले समेत व्यापक विरोध जनाइ सकेको अवस्थामा सरकारले गरेको यो निर्णय सच्याउनुको विकल्प नभएको विज्ञप्तीमा उल्लेख छ ।

नेपालको संविधानको धारा ७ मा सरकारी कामकाजको भाषा देवनागरी लिपिमा लेखिने संबैधानिक व्यवस्था भएको तर्फ सरकारको ध्यानकर्षण गराउँदै इम्बोस्ट नम्बर प्लेट अंग्रेजीमा नभई देवनागरी लिपिमा हुने गरी जडान गर्ने व्यवस्था मिलाउन जोडदार माग गरिएको छ ।

त्यसैगरी नेपाली लेखक संघले पनि विज्ञप्ती जारी गर्दै नेपालभित्र दर्ता भएका सवारी साधनहरूमा जडान गरिने इम्बोस्ट नम्बर प्लेट अङ्ग्रेजी भाषामा हुने गरी सरकारको निर्णय यथावत रहेको र कार्यान्वयनमा लग्न खोजेको विषयप्रति ध्यानाकर्षण भएको जनाएको छ । अध्यक्ष  वियोगी बुढाथोकी र महासचिव सोझो गाउँलेद्वारा संयुक्त हस्ताक्षरित विज्ञप्तीमा नेपाली भाषा नेपालको साझा सम्पर्कको भाषा भएको उल्लेख गर्दै इम्बोस्ट नम्बर प्लेट नेपाली भाषामा एवं देवनागरी लिपिमा हुनुपर्ने व्यवस्था मिलाउन सरकारसँग माग गरिएको छ ।

यसैबिच विभिन्न नेपाली भाषाविदहरूले पनि नेपाली भाषाको अवमुल्यन हुने गरी सवारी साधनमा अंग्रेजी इम्बोस्ट नम्बर प्लेट जडान गरिनु दुर्भाग्यपूर्ण हुने र यस्तो निर्णय सरकारले तत्काल सच्याउनु पर्ने बताइरहेका छन् ।