अन्तर्राष्ट्रिय नेपाली साहित्य समाज (अनेसास)ले सर्वोत्कृष्ट पुस्तक पुरस्कार २०२५ लक्ष्मी जयन्तीको अवसर पारेर आउँदो नोभेम्बर १ मा अमेरिकाको भर्जिनियामा वितरण गर्ने भएको छ ।

अनेसास बिओटीद्वारा व्यवस्थापन गरिएको सो पुरस्कार गत भानुजयन्तीको अवसर पारेर गरिएको एक कार्यक्रममार्फत सार्वजनिक गरिएको थियो ।

अनेसास पुरस्कार समितिलाई प्राप्त दुई सय बीसवटा पुस्तकहरूमध्येबाट रोशन थापा नीरवद्वारा लिखित उपन्यास ‘सन्त्रासका साठी दिन’लाई एक्काइसय अमेरिकी डलर राशिको सर्वोत्कृष्ट पुस्तक पुरस्कार प्रदान गरिने घोषणा गरिएको थियो।

सोही अवसरमा डा। तुलसी आचार्यद्वारा लिखित ‘स्वप्नभूमी’ उपन्यासलाई होमनाथ सुवेदी डायस्पोरा बाङमय पुरस्कार, मोमिलाद्धारा लिखित निबन्ध संग्रहलाई सर्वोत्कृष्ट तीर्थ पाण्डे निबन्ध पुरस्कार, डा. दुर्गाबहादुर घर्तीद्वारा लिखित ‘साँस्कतिक अध्ययन’लाई सीता शर्मा संस्कृति तथा दर्शन सर्वोत्कृष्ट पुरस्कार, जगन्नाथ पौडेलद्वारा लिखित कविता संग्रह ‘बग्दै बग्दै’ लाई अनेसास राष्ट्रकवि सर्वोत्कृष्ट डायस्पोरा काव्य पुरस्कार, कृशु क्षेत्रीद्वारा लिखित कविता संग्रह ‘पसिनाको क्यानभास’लाई अनेसास राष्ट्रकवि सर्वोत्कृष्ट काव्य पुरस्कार, कृष्ण कुसुमको कथा संग्रह ‘पार्श्वधुन’लाई अनेसास सर्वोत्कृष्ट कथा पुरस्कार, अखण्ड भण्डारीको उपन्यास ‘बोरा’लाई अनेसास नारायण पाण्डे सर्वोत्कृष्ट उपन्यास पुरस्कार प्रदान गरिने घोषणा भएको थियो। ती सबै पुरस्कारका राशि एक हजार अमेरिकी डलर रहेको छ ।

त्यसैगरी पाँचसय अमेरिकी डलर राशिका अनेसास लक्ष्मण सत्याल सर्वोत्कृष्ट गीत पुरस्कार र अनेसास सर्वोत्कृष्ट बाल साहित्य पुरस्कार क्रमशः लक्ष्मण सिटौलाको ‘धर्तीको ध्वनि’ र विमला निरौला ढुंगानाको ‘यात्रामा देश’लाई प्रदान गरिने घोषणा गरिएको थियो। एक हजार पाँचसय अमेरिकी डलर राशिको अनेसास नन्दादेवी सर्वोत्कृष्ट लोक साहित्य पुरस्कार भने शशिराम कार्कीद्वारा लिखित ‘रुकुमका लोककथा’लाई प्रदान गर्ने घोषणा गरिएको थियो ।

ती फरक-फरक पुरस्कारहरू अनेसास बोर्ड अफ ट्रस्टी, प्रा.डा. गोपी उप्रेती, रोहिणी शर्मा, तीर्थराज पाण्डेय, गीता खत्री, रश्मी भट्ट, विश्वबहादुर शाह, पदम विश्वकर्मा, नारायण पाण्डे, पुरु तथा कल्पना सुवेदी, शिव लामिछाने तथा भीम रेग्मी र रितादेवी प्रधानले प्रायोजन गरेका हुन् ।

उल्लेखित पुरस्कारहरु आगामी नोभेम्बर १ का दिन अमेरिकाको भर्जिनियमा लक्ष्मी जयन्तीको अवसरमा गरिने समारोहमा वितरण गरिने कुरा अनेसास बोर्ड अफ ट्रस्टीका सभापति पदम विश्वकर्माले बताएका हुन् ।