काठमाडौं । नेपाल स्रष्टा समाजद्धारा राजधानीमा आयोजित एक साहित्यिक कार्यक्रममा एकसाथ दुई कृति सार्वजनिक गरिएका छन् । ती मध्ये एक ‘दार्चुला कला साहित्य’ र अर्को ‘किशनसिंह धामी व्यक्ति र कृति’ हुन् ।

ती कृतिहरु वरिष्ठ साहित्यिक पत्रकार नगेन्द्रराज शर्मा, डा.तारा निरौला, श्रीओम श्रेष्ठ रोदन, प्रा.डा खगेन्द्र लुइँटेल, किसनसिंह धामी, पवन आलोक, प्रा.डा.लक्ष्मणप्रसाद गौतम, प्रमोद प्रधान, प्रा.डा.भरतकुमार भट्टराई, ज्ञानु अधिकारी कृतिकार नेत्रप्रसाद फूयाल लगायतले लोकार्पित गरेका हुन् ।

प्रमुख अतिथि वरिष्ठ साहित्यिक पत्रकार नगेन्द्रराज शर्माले नेपाली भाषा, साहित्यमा गतिविधिहरु निरन्तर भैरहनुपर्नेमा जोड दिँदै किशनसिंह धामीले डायस्पोरामा बसेर नेपाली भाषा साहित्य र संस्कृतिको जगेर्नामा गरेको कार्यको प्रशंसा गरे ।

लोकार्पित कृतिहरुमाथि वरिष्ठ समालोचक प्रधान र प्रा.डा. भट्टराईले परिचर्चा गरेका थिए । अतिथिहरुले शुभकामना मन्तव्य राख्ने क्रममा धामीको योगदानको खुलेर चर्चा गरेका थिए ।

नेपाल स्रष्टा समाजका केन्द्रीय अध्यक्ष श्रीओम श्रेष्ठ रोदनको सभापतित्वमा सम्पन्न उक्त कार्यक्रमा स्वागत मन्तव्य समाजका महासचिव प्रकाश घायलले राखेका थिए भने कार्यक्रमको सञ्चालन  समाजका सदस्य प्रदीप सापकोटाले गरेका थिए । कार्यक्रमको पूर्वार्द्धमा सुदुर पश्चिम नेपालको साँस्कृतिक झाँकी समेत प्रस्तुत गरिएको थियो ।