स्रष्टासँग सत्र प्रश्न

लमजुङको सुन्दरबजार नगरपालिका–३, देवतापानी, दुराडाँडाको पवित्र माटोमा वि.सं. २००३ साल मङ्सिर ३० गते जन्मिएका तीर्थराज अधिकारी नेपाली साहित्य, विशेषतः कविता, गीत र मुक्तक विधामा आफ्नो विशिष्ट पहिचान बनाएका सशक्त स्रष्टा हुन् । स्व. माता रुक्मिणा अधिकारी र स्व. पिता नारायणदत्त अधिकारीका सुपुत्र उहाँले स्नातकोत्तर (राजनीति शास्त्र) सम्मको शैक्षिक यात्रा पूरा गर्दै जीवनलाई विचार, चेतना र सिर्जनाको सम्मीश्रणका रूपमा अघि बढाउनुभएको हो । हाल संयुक्त राज्य अमेरिकाको ओहायोमा बसोबास गर्दै आउनुभएका अधिकारी प्रवासमा रहेर पनि नेपाली साहित्यको सेवा र समृद्धिमा निरन्तर समर्पित छन् ।

उहाँको साहित्यिक यात्रामा “जुनकीरी”, “ऐना”, “तीन लय तेह्र गीत”, “झटारो”, “यो कस्को हात हो ?”, “बिरिमफूल”, “जूनका टुक्राहरू”, “दोभान” र “सारवत” जस्ता कविता तथा मुक्तक सङ्ग्रहहरूले गहिरो छाप छोडेका छन् । नेपालीसँगै अङ्ग्रेजी अनुवादमा समेत कृति प्रकाशन गरी उहाँले आफ्नो सिर्जनालाई अन्तर्राष्ट्रिय आयाम दिनुभएको छ । गीत–सङ्गीत क्षेत्रमा पनि सक्रिय उहाँका “लमजुङको सम्झना”, “माया” जस्ता गीति सीडीहरूले नेपाली भावनालाई स्वर दिएका छन् । साहित्यिक योगदानका लागि प्रवल गोरखादक्षिण बाहु, राष्ट्रपतिको कदर, मुक्तकमणि सम्मान लगायत दर्जनौँ सम्मान र उपाधिहरूबाट उहाँ विभूषित हुनुहुन्छ ।

अन्तर्राष्ट्रिय नेपाली साहित्य समाज (अनेसास) सहित विभिन्न साहित्यिक तथा सामाजिक संस्थामा सल्लाहकार, संरक्षक र आजीवन सदस्यका रूपमा आबद्ध अधिकारीले नेपाली साहित्यलाई प्रवासमा पनि जीवन्त राख्न महत्त्वपूर्ण भूमिका निर्वाह गर्नुभएको छ । विश्वका थाइल्याण्डदेखि युरोप, अमेरिका, एसिया र मध्यपूर्वसम्मको व्यापक भ्रमण अनुभवले उहाँको दृष्टि अझ विस्तृत र संवेदनशील बनेको छ । सिर्जना, साधना र समर्पणको त्रिवेणी बनेर उभिनुभएका तीर्थराज अधिकारी नेपाली साहित्य आकाशका एक उज्याला नक्षत्रका रूपमा चम्किरहेका छन् । यिनै नक्षत्र मुक्तकमणि तीर्थराज अधिकारीसँग स्मारिकाका प्रधान सम्पादक रमेश दाहालले गरेका सत्र प्रश्न र त्यसका सटिक उत्तर ।