कोलोराडो, १ बैशाख ।
अन्तर्राष्ट्रिय नेपाली साहित्य समाज (अनेसास) कोलोराडो शाखाले वरिष्ठ कवि एवं गीतकार दिनेश अधिकारीलाई सम्मान गरेको छ ।

कोलोराडोस्थित नेपाली घरमा आईतवार आयोजित एक कार्यक्रममा अनेसास कोलोराडो च्याप्टरले सर्जक अधिकारीलाई सम्मान गरेको हो ।

अनेसास बीओटी सभापति पदम विश्वकर्मा, अनेसास केन्द्रीय महासचिव राजु सिटौला र कोलोराडो च्याप्टरका अध्यक्ष किरण अधिकारीले सर्जक अधिकारीलाई खादा, रुद्राक्षको माला र प्रशंसा पत्र सहित संयुक्त रुपमा सम्मान गरे ।

अनेसासकी केन्द्रीय कोषाध्यक्ष तारा अधिकारीले साहित्यकार डा. ज्ञानेन्द्र गदाललाई खादा लगाएर सम्मान गरिन् । 

साहित्यकार मिलन कोइरालाले वरिष्ठ गीतकार अधिकारीको कृतित्व र व्यक्तित्वका बारेमा चर्चा  गरे ।

कार्यक्रममा कवि तथा गीतकार अधिकारीले आफ्ना कविता तथा गीत वाचन गर्दै सबैलाई मन्त्रमुग्ध बनाए ।

सोही कार्यक्रममा साहित्यकार डा.ज्ञानेन्द्र गदालका २ वटा पुस्तक भोलिको आश उज्यालो प्रकाश (बालगीत सङ्ग्रह) र कुमुदिनी (उपन्यास) को प्रमुख अतिथि अधिकारी तथा युवाद्वय सरगम गदाल र सरल गदालले सार्वजनिक गरे । 

साहित्यकार तथा अनेसास बोर्ड अफ ट्रष्टी प्रमिला शर्माले बालगीत संग्रहमाथि र साहित्यकार तथा अनेसास कोलोराडो च्याप्टरका पूर्व अध्यक्ष कृष्ण मुरारी ढुंगलले कुमुदिनी उपन्यासमाथि टिप्पणी  गरे ।

साहित्यकार गदालले पुस्तकका बारेमा आफ्नो अनुभूति सुनाउने क्रममा नयाँ पुस्ताका लागि पुस्तक अंग्रेजीमा अनुवाद गर्ने बताए ।

अनेसास कोलोराडो च्याप्टरका अध्यक्ष अधिकारीको अध्यक्षतामा सम्पन्न कार्यक्रममा महासचिव पुष्पराज पौडेलले स्वागत मन्तव्य व्यक्त गरेका थिए ।

कार्यक्रम समापनका क्रममा अध्यक्ष अधिकारीले सम्मानित गीतकार अधिकारीलाई बधाई र सहभागीहरुलाई धन्यवाद दिए । 

कार्यक्रममा ब्लड डोनर्स एशोसियसन अमेरिका (बीडीए) का वरिष्ठ उपाध्यक्ष टीका पौडेल, गायिका रिमा होडा,नेवाः खलःका उपाध्यक्ष मनोज तुलाधर, अनेसास कोलोराडोका सल्लाहकार तथा पूर्वअध्यक्ष भूपेन्द्र महत, समाजसेवी डा. विजयराज शर्मा, नेपाली घरका पूर्व अध्यक्ष जगदीश ढकाल लगायतको उपस्थिति रहेको थियो ।