नियात्राकार गीता खत्रीलाई ‘प्रतीक ढकाल नियात्रा सौरभ’

पवित्रा ढकाल स्मृति कोषले प्रत्येक वर्ष प्रदान गर्दै आएको ‘प्रतीक ढकाल नियात्रा सौरभ’ २०८० नियात्राकार गीता खत्रीलाई प्रदान गर्ने निर्णय गरेको छ । साहित्यकार महेश पौड्यालको संयोजनमा  बसेको निर्णायक समितिको बैठकले उक्त पुरस्कार अमेरिकामा रहेर सिर्जनरत साहित्यकार खत्रीलाई  प्रदान गर्ने निर्णय गरेको हो । 

रु. ५१ हजार नगद तथा सम्मानपत्र रहेको उक्त पुरस्कार खत्रीलाई उनका नियात्राकृति ‘झोखाङदेखि मजाटलानसम्म (२०७१) र उडेको आकाश डुलेको धरती (२०७८)’ का लागि समर्पण गरिएको हो ।

नियात्रका अतिरिक्त खत्रीका गीत, गजल र कथाका सङ्कलन तथा साङ्गीतिक एल्बमहरू प्रकाशित छन् । साहित्यकार खत्री 

अनेसास बोर्ड अफ ट्रस्टिजका निवर्तमान सभापति पनि हुन्। 

यो पुरस्कार प्रत्येक वर्ष श्रीपञ्चमीका दिन घोषणा गरेर अर्को वर्षको जेष्ठ १३ गते प्रदान गरिने परम्परा रहेको  छ ।  २०७६ सालदेखि प्रदान गर्न प्रारम्भ गरिएको यो पुरस्कार खत्रीभन्दा अघि नियात्राकारहरू डा. तारानाथ शर्मा, सत्यमोहन जोशी, देविचन्द्र श्रेष्ठ र भुवनहरि सिग्देलले प्राप्त गरिसकेका छन् ।