सिड्नी, अस्ट्रेलिया।
प्रशान्त महासागरको किनारमा रहेको सुकिलो सहर सिड्नीमा नेपाली वाङ्मयको एउटा नयाँ र स्वर्णिम अध्याय थपिएको छ। अप्रिल २५, २०२६ का दिन आयोजित एक भव्य समारोहका बीच ‘अस्ट्रेलिया दर्पण’ कृतिको विमोचन र अन्तर्राष्ट्रिय नेपाली साहित्य समाज (अनेसास) एनएसडब्लु च्याप्टरको नयाँ कार्यसमिति गठन कार्य भव्यताका साथ सम्पन्न भयो।
अनेसास एनएसडब्लु च्याप्टरका अध्यक्ष डा. प्रकाश पौडेलको ओजिलो सभापतित्व र अनेसास केन्द्रीय कार्यसमितिका वरिष्ठ उपाध्यक्ष लालगोपाल सुवेदीको प्रमुख आतिथ्यमा सम्पन्न उक्त कार्यक्रमले प्रवासमा नेपाली भाषा र साहित्यको बढ्दो गरिमालाई पुनः पुष्टि गरेको छ।
कार्यक्रमको पहिलो चरणमा प्रमुख अतिथि, विशेष अतिथि र पूर्व अध्यक्षहरूको समूहले संयुक्त रूपमा ‘अस्ट्रेलिया दर्पण’ साहित्यिक पत्रिकाको विमोचन गर्नुभयो। दीप प्रज्वलन र राष्ट्रिय गानको गुञ्जनसँगै सुरु भएको उक्त समारोहमा यो कृतिलाई प्रवासको व्यस्तताबीच नेपाली मुटुको धड्कन र सिर्जनाको जीवन्त ऐनाका रूपमा चित्रण गरियो। प्रमुख अतिथि लालगोपाल सुवेदीले यस कृतिमा अस्ट्रेलियाभरिका सर्जकहरू अटाएको र यसले अनेसास केन्द्रकै शिर उच्च बनाएको बताउनुभयो। उहाँले थप्नुभयो, “डा. प्रकाश पौडेल र उहाँको टिमको रगत-पसिनाले सिञ्चित यो कृति अनेसास केन्द्रले गर्व गर्ने स्तरको छ।”

समारोहमा शुभकामना मन्तव्य राख्दै एनआरएनएका नेतृत्वकर्ताहरू उषाकिरण बरिया, आशा श्रेष्ठ र विष्णु हमालले डा. पौडेलको कार्यकालमा भएका बाक्ला गतिविधिले जनमानसमा सांस्कृतिक चेतनाको नयाँ पालुवा पलाएको धारणा राख्नुभयो। साहित्यकार सुरेन्द्र दवाडीले पत्रिकामा आजको नेपाली समाजको वस्तुस्थिति छर्लङ्गिएको बताउनुभयो भने अनेसास केन्द्रका पूर्व उपाध्यक्ष आचार्य राजन शर्माले केन्द्रको उपस्थितिले स्थानीय सर्जकहरूमा अपनत्व र आशाको किरण सञ्चार गरेको भाव व्यक्त गर्नुभयो। प्रमुख अतिथि सुवेदीले वाचन गर्नुभएका छन्दोबद्ध कविताका लहरहरूले सिङ्गो हललाई केही बेर ध्यानमग्न बनाएको थियो।
साहित्यको यो उत्सवमा अक्षरहरू मात्र होइन, रङ र प्रविधिको पनि जादु देखियो। बाल प्रतिभा आयाम घिमिरेको एकल चित्रकला प्रदर्शनी तथा बाबु तिवारी र आरोग्य गिरीको पावरपोइन्ट प्रस्तुतिले नेपालको बहुआयामिक चित्रलाई जीवन्त बनायो। साथै, बाल वक्तृत्व प्रतियोगिताका विजयी प्रतिभाहरूलाई पुरस्कृत गरी उनीहरूलाई नेपाली भाषाप्रति प्रोत्साहित गरियो।
नयाँ नेतृत्वको शंखघोष
कार्यक्रमको दोस्रो चरणमा निर्वाचन समितिले सन् २०२६-२०२८ कार्यकालका लागि नयाँ कार्यसमिति घोषणा गर्‍यो, जसलाई महासभाले तालीका साथ अनुमोदन गर्‍यो। नयाँ कार्यसमिति यस प्रकार रहेको छ:
अध्यक्ष: भावना पराजुली
उपाध्यक्ष: डा. राजु मानन्धर
महासचिव: नगेन्द्र भट्टराई
सचिव: नेत्रप्रसाद पौडेल, प्रेक्षा कणेल
पब्लिक अफिसर: सरोज पाण्डे
सदस्यहरू: बालकृष्ण बस्याल, सितु श्रेष्ठ, दयाराम सिम्खडा, महिमा दीप फुल्लेल
निवर्तमान अध्यक्ष डा. प्रकाश पौडेलले आफ्नो दुई वर्षे कार्यकालमा २२ वटा कार्यक्रम सफलताका साथ सम्पन्न गरेको प्रसंग उल्लेख गर्दै नयाँ टोलीलाई शुभकामना दिनुभयो। नव-निर्वाचित अध्यक्ष भावना पराजुलीले सबै अग्रज, आजीवन सदस्य र साहित्यप्रेमीहरूको साथ लिएर आफ्नो कार्यकाललाई सफल बनाउने दृढ संकल्प व्यक्त गर्नुभयो।
अनेसास सिड्नीकी महासचिव भावना पराजुलीको कुशल सहजीकरणमा सम्पन्न उक्त कार्यक्रममा समाजसेवी, साहित्यकार, कलाकार र पत्रकारहरूको बाक्लो उपस्थिति रहेको थियो, जसले सिङ्गो सिड्नीलाई नेपाली अक्षरहरूको उत्सवमा रङ्गाएको थियो।